Kleine Fortsetzung von «D Seisler hiis böös» gefunden!

• Dieser Sensler Mundarttext wurde grad kürzlich entdeckt. Eine archäologische Sensation!

De Toni Schöpfer wärchet zwaar ùmmi ùs Chömifääger – aber ma kennt ne no guet. Schliesslich het äär ù syni Seisler Hotline dezue gfüert, dass de Seisebezirk nit yybbäärneret choo isch. Bi der Gglägehiit het er erfougryych d Uufstyygsspǜü vo de C-Liga i d B-Liga ùnder de Prominente hinder sich praacht.
De frǜsch bbache B-Promi Toni höcklet hüt z Frybùrg vor ùm Rathuus im Schatte ù lööst as Sudoku. A zweita Maa isch mit iim ùf ùm glyyche Bänkli ù list as Buech. Da chùnt doch iini ù fragt, ob si mit iim cheni as «Selfie» mache. Lyyslig fragt de Toni de Maa, wo näbe iim hocket: «Dier, was wetti ächt dia vo mier?». «Nüüt schlǜmms. Nùme as Föteli.»

De Toni Schöpfer wärchet zwaar ùmmi ùs Chömifääger – aber ma kennt ne no guet. Schliesslich het äär ù syni Seisler Hotline dezue gfüert, dass de Seisebezirk nit yybbäärneret choo isch. Bi der Gglägehiit het er erfougryych d Uufstyygsspǜü vo de C-Liga i d B-Liga ùnder de Prominente hinder sich praacht.
De frǜsch bbache B-Promi Toni höcklet hüt z Frybùrg vor ùm Rathuus im Schatte ù lööst as Sudoku. A zweita Maa isch mit iim ùf ùm glyyche Bänkli ù list as Buech. Da chùnt doch iini ù fragt, ob si mit iim cheni as «Selfie» mache. Lyyslig fragt de Toni de Maa, wo näbe iim hocket: «Dier, was wetti ächt dia vo mier?». «Nüüt schlǜmms. Nùme as Föteli.»
De Toni lachet a bitz vùrtrǜckt, we dä wyyblich Fään de Aarm imù ùf d Achsla liit ù abtrǜckt. «Gschafft. Guet, wytterlööse», deicht de Toni. «Hie cha nùme 4 oder 5 syy, oder?» Är fröyt sich scho ùf ds Bierli hindernaa, won er näy i de Schwyzerhala ääne wott ga chnǜtsche.
A Schuuklass mit tütschspraachige Chinn chùnt ù wott ds histoorisch Gebüüd cho aaggùgge. Hörbschtwanderig oder so. D Leereri kennt de Toni. Si wiis, was i de lötschte Wùche aus passiert isch. Dewyle wo de Wiibù de Chinn de Rathuus-Saau erkläärt, trǜfft si a auti Frǜndin ùs de Trachtegrùppa. Dia ziigt ra ds Selfie, wo si graad vori mit dùm Toni gmacht hiigi: «Hǜbsch, gau!»
«Ou, so iis muess i o haa», lachet d Leereri ù scho feet si vor ùm Bänkli vom berüemte Toni Schöpfer a Kolona aa. Dä ggùgget vo sym Sudoku uuf ù macht das Spiili haut no iinisch mit. Är lachet itz quääut das Smart Phone aa. I dem Moment chäme d Schülerine ù Schüeler zrùgg ù fraage, was iines Leereri da machi.
«Das isch dää, wo d Seisler ggrettet het!», erkläärt ne d Frou, wo ds eerscht Selfie gmacht het.
De Toni köört daas ù wot abwinke, aber di Frou chlopfet mù ùf d Achsla: «E moou, stǜmmt doch!» Ù zù de Chinn siit si: «Laat nùch doch vom Toni o as Outogramm la gää. Öyer Öutere wääre schöö Ùùge mache!»
Mit Chinn chas de Toni i de Regla guet. Drùm laat er daas amaau so la staa.
As paar Chinn chäme itz langsam zue mù mit dùm Flyer, wo drùf ds Rathuus erkläärt isch. Ander hii a Zedù vom a Block abgschrisse ù streckes im Berüemte aggäge. De Toni laferet chli mit ne ù schrybt mengisch no as Sprǜchli vor d Ùnderschrǜft. As Miitli het sogaar as Fröynde-Büechli, wo mù no mee ùber sich setti schryybe. Ù iina streckt mù sy Rùcksack aggäge: «Graad da drùf.». Guet het de Toni no a wasserföschta Fǜüzstǜft i sym Rùckseckli gfùne.
Dewyle won er i de Täscha ùma nüelet, ggùgget er i d Rùndi. Da gseet er chli hinder de andere Chinn: Dasch doch de Luis, de Bueb vom Lisi, de Serviertochter im Hindere. A zǜmlicha Fremdkörper – de Rùcksack ù d Jagga no aa, o wes gäge di 30 Graad giit. Är winkt mù: «Hey, sälü Luis!» Dää aber macht bitz a Grimassa ù lǜpft d Hann nùme as par Zentimeeter. Är isch gaar nit woou.
De Toni meerkt daas schoo, aber är deicht, das sygi itz fùr dä Bueb di Schangs, sich maau i de Klass i Vordergrùnd z rǜcke. «Chomm, Luis», weejt er ne häre, «chasch oo». Synner Koleege wääre schöö ggùgge!
Langsam trottet de Luis i syni Richtig. De Toni ùnderschrybt dewyle de Rùcksack vom andere Bueb. «Gfaut es der i de Stadt?», fragt er de schüüch Büebù. Oni a Antwort abzwaarte, treejt er de Luis a de Achsle vo sich wägg. Är ùnderschrybt o graad ùf dem Rùcksack. «Gisch im Mami a schööna Gruess, gau.»
Am Aabe bùchùnt de de Toni as Telefon vom Lisi: «Dù, was isch da iigentlich loos, Töönù. Was isch de Luis hiim cho verzöle? Dù hiigisch iim i de Stadt ùne de schöö, nüü Rùcksack verchräblet? Giits no?»
Ou, ja dùù. – Wo si rächt het, het si rächt.